चीनले अन्तरिक्षमा सौर्य ऊर्जा स्टेशन निर्माण गर्ने महत्वाकांक्षी योजना अघि बढाएको छ। यस प्रविधिले पृथ्वीबाट बाहिर कक्षामा नै सूर्यको ऊर्जा संकलन गरी त्यसलाई माइक्रोवेभमार्फत पृथ्वीमा स्थानान्तरण गर्नेछ।

अन्तरिक्ष-आधारित सौर्य ऊर्जा प्रविधिमा फोटोभोल्टेइक (Photovoltaic) सेलहरूको प्रयोग गरी सूर्यको ऊर्जा विद्युत्मा परिवर्तन गरिन्छ। त्यसपछि यो ऊर्जा माइक्रोवेभमा रूपान्तरण गरी पृथ्वीका ग्राउन्ड स्टेसनहरूमा वायरलेस रूपमा पठाइन्छ। प्राप्त ऊर्जा फेरि विद्युत्मा रूपान्तरण गरिएपछि दैनिक प्रयोगका लागि उपलब्ध हुनेछ।

चिनियाँ इञ्जिनियरिङ एकेडेमीका वैज्ञानिक लङ लेहाओका अनुसार चीनले करिब ३६,००० किलोमिटर उचाइमा, भूस्थिर कक्षमा, एक किलोमिटर फराकिलो सौर्य ऊर्जा स्टेशन निर्माण गर्ने लक्ष्य राखेको छ। यो प्रविधिले दिन-रात तथा मौसमी परिवर्तनको प्रभाव नपर्ने भएकाले लगातार ऊर्जा उत्पादन गर्न सक्नेछ। साथै, पृथ्वीमा अवस्थित सौर्य प्यानलहरूको तुलनामा उच्च दक्षतामा सञ्चालन हुन सक्ने अनुमान गरिएको छ।

चीनले यो महत्वाकांक्षी परियोजनालाई सफल बनाउन सुपर-हेभी रकेटहरूको प्रयोग गर्ने योजना बनाएको छ। यस प्रणालीले भविष्यमा अधिक स्थिर र दिगो ऊर्जा समाधानतर्फ मार्ग प्रशस्त गर्ने विश्वास गरिएको छ।