काठमाडौं- कोशी ब्यारेजबाट सप्तकोशी नदीमा एउटा यात्रुवाहक बस खसेको छ । विराटनगरबाट उदयपुरको गाईघाट तर्फ जाँदैगरेको नरसिंह ट्राभल्सको को १ ख ४६०१ नम्बरको बस पूर्व-पश्चिम राजमार्गअन्तर्गत कोशी ब्यारेजको पुलबाट सप्तकोशी नदीमा खसेको हो ।

बस आफैं अनियन्त्रित भई पुलको बार भत्काउँदै ब्यारेजको ३३/३५ नम्बर ढोका अगाडिबाट नदीमा खसेको प्रहरीले जनाएको छ । बसमा रहेका सबै २० जना यात्रुको सकुशल उद्धार गरिएको छ ।

बसका चालक सिरहा लहान नगरपालिका-८ का ३५ वर्षीय चन्दनकुमार मेहता इलाका प्रहरी कार्यालय भारदह सप्तरीको नियन्त्रणमा छन् ।